Kontabilist dhe auditor në Pejë

Kjo është baza jonë, jo një zyrë përfaqësimi

Fryti Audit SH.P.K. punon nga Zahaqi që nga viti 2016. Këtu janë njerëzit, dosjet dhe puna — nuk kemi zyrë qendrore diku tjetër. Firma është e licencuar nga KKRF (Këshilli Kosovar për Raportim Financiar) dhe anëtare e SCAAK-ut, ndërsa auditimet i nënshkruan Diedon Berisha si auditor ligjor.

Për ju dallimi është i thjeshtë: takimi nuk është ngjarje që planifikohet një javë përpara. Nëse ju vjen një letër nga ATK-ja ose banka ju kërkon pasqyra për kredi, kaloni nga zyra. Zahaqi është në magjistrale — nuk hyni fare në trafikun e qendrës dhe keni ku ta parkoni veturën.

Si duket puna në praktikë me një biznes të Pejës

Fillojmë me një takim ku na tregoni çfarë veprimtarie keni, sa fatura ju kalojnë në muaj, a jeni në TVSH dhe si qëndroni te ATK-ja. Nëse vini nga një kontabilist tjetër, shikojmë bashkë çfarë ka mbetur pa mbyllur — pjesa që krijon probleme më vonë.

Pastaj i dorëzoni dokumentet ashtu si ju bie më lehtë:

• Fizikisht — i sillni faturat dhe kuponët fiskalë në zyrë. Ne i skanojmë dhe i regjistrojmë, ndërsa origjinalet i merrni prapa, sepse ligji kërkon që dokumentacionin ta ruajë vetë biznesi.
• Online — hapim një folder të përbashkët ku i ngarkoni gjatë muajit, si skanim ose fotografi e qartë nga telefoni.
• Të përziera — kështu punon shumica e klientëve.

Edhe me kliente të Pejës, rreth 90% e punës bëhet online — sepse është më e shpejtë, jo sepse është e detyrueshme. Procesin e plotë e keni te faqja si punojmë. Takohemi së paku një herë në muaj; me një firmë ndërtimi që ka disa punishte të hapura, shumë më shpesh.

Nga Zahaqi, edhe Istogu, Klina, Deçani, Gjakova e Juniku janë brenda gjysmë ore me veturë.

Bujqësi, kultivim fidanësh dhe pemëtari

Fidanishtet dhe pemishtet kanë një veçori që shumë pronarë e zbulojnë vonë: cikli i prodhimit është më i gjatë se viti fiskal. Shpenzimet bëhen një vit, të ardhurat vijnë vitin ose vitet pasuese. Nëse hidhen thjesht si kosto e vitit në të cilin janë paguar, rezultati del i shtrembëruar — humbje sot, fitim i fryrë nesër. Kulturat shumëvjeçare trajtohen si pasuri e biznesit dhe amortizohen. Për prodhuesit e vegjël që nuk mbajnë libra të plota, kësti tremujor llogaritet si 3% e të hyrave bruto nga bujqësia — regjim që vlen për të hyra bruto vjetore deri në 50.000 euro te biznesi individual dhe deri në 30.000 euro te korporatat.

Gurëthyes dhe materiale inerte

Këtu peshën më të madhe e mbajnë matja e stoqeve dhe e prodhimit, konsumi i karburantit dhe amortizimi i makinerisë së rëndë. Një veturë shpërndarjeje dhe një thyerës guri nuk amortizohen njësoj, dhe një kosto e vendosur gabim te pasuritë fikse ndryshon fitimin e tatueshëm për vite me radhë. Kësaj i shtohen detyrimet specifike të veprimtarisë minerare.

Tregti dhe import-eksport

Për bizneset që importojnë, puna nis te deklarata doganore dhe te TVSH-ja në import: kur lind e drejta e zbritjes dhe si kalkulohet kostoja e mallit deri në depo. Një gabim i shpeshtë është zbritja e faturave shumë vonë — fatura hyrëse nuk mund të zbritet më vonë se periudha e fundit tatimore e vitit që vijon vitin e faturës.

HoReCa dhe turizmi malor

Restorantet dhe bujtinat, sidomos ato të Rugovës, kanë të njëjtin problem çdo vit: sezonin. Stafi shtohet për disa muaj, orët ndryshojnë dhe qarkullimi bëhet me shumë transaksione të vogla përmes arkës fiskale. Pikërisht këtu dalin më shpesh gabimet e pagave. Punëtori duhet të regjistrohet në ATK para se të fillojë punën, paga nuk mund të jetë nën pagën minimale — 500 euro bruto në muaj nga 1 korriku 2026 — dhe deklarimi bëhet deri më 15 të muajit pasues. Sa del neto një pagë e caktuar e shihni te kalkulatori i pagave.

Ndërtimtari

Fatura dhe paratë rrallë vijnë në të njëjtin muaj, prandaj njohja e të ardhurave sipas fazave të punës është çështja kryesore. Pa kosto të ndarë për projekt, në fund të vitit dilni me një total që nuk ju thotë se cili objekt ju ka dalë me fitim.

Shërbimet që na kërkohen më shpesh në Pejë

Pjesa dërrmuese e punës është kontabiliteti mujor: faturat, pagat, deklarimi i TVSH-së përmes EDI-t dhe pasqyrat vjetore. Pas kësaj vijnë tri kërkesa që përsëriten:

• Pasqyra financiare për bankë — kur biznesi aplikon për kredi ose garanci dhe i duhen pasqyra të përgatitura si duhet, jo një tabelë e mbledhur me nxitim.
• Rishikim ose auditim — kur biznesi kalon pragjet e klasifikimit. Për një ndërmarrje të vogël ose të mesme me qarkullim deri në 4.000.000 euro kërkohet rishikim, mbi këtë shifër auditim nga firmë e licencuar nga KKRF. Kategorinë e kontrolloni te kalkulatori i klasifikimit, detajet te faqja e auditimit.
• Ndihmë gjatë kontrollit tatimor — përgatitja e dokumentacionit dhe komunikimi me inspektorin. Ky është momenti kur kuptohet nëse librat janë mbajtur rregullisht.

Afatet i ndjekim ne, jo ju

Ankesa më e shpeshtë e bizneseve që vijnë te ne është e njëjta: kontabilisti nuk lajmërohej dhe afati kalonte.

Kalendarin e plotë e keni te afatet tatimore.

A vij unë te ju, apo vini ju te unë?

Përgjigjja e ndershme është: në fillim është më mirë të vini ju. Takimi i parë ecën më shpejt në zyrë, sepse aty i kemi para vetes edhe dosjet edhe sistemin.

Pas kësaj, nuk keni pse të vini fare nëse nuk dëshironi. Vijmë ne te ju kur ka arsye reale — kur duhet parë inventari, kur dokumentet janë shumë për t'u bartur, ose kur takimi kërkon praninë e disa personave nga stafi juaj. Për një pyetje të vetme, telefonata e zgjidh punën më shpejt se udhëtimi.