Si llogaritet paga neto në Kosovë
- Nga paga bruto zbritet kontributi pensional 5% (Trusti).
- Mbi pjesën e mbetur (baza tatimore) zbatohet tatimi progresiv në paga (TAP): 0% deri 250 €, 8% për 250–450 € dhe 10% mbi 450 € në muaj.
- Ajo që mbetet është paga neto — shuma që merr punëtori në dorë.
- Punëdhënësi paguan edhe 5% kontribut shtesë — kosto totale = bruto + 5%.
Shembuj të shpejtë
| Paga bruto | Paga neto | Kosto e punëdhënësit |
|---|---|---|
| 500,00 EUR | 456,50 EUR | 525,00 EUR |
| 600,00 EUR | 542,00 EUR | 630,00 EUR |
| 800,00 EUR | 713,00 EUR | 840,00 EUR |
| 1.000,00 EUR | 884,00 EUR | 1.050,00 EUR |
Kur punëdhënësi nuk është kryesori
Kur dikush punon te dy vende, vetëm njëri është punëdhënësi kryesor. Tjetri, sipas nenit 38, paragrafi 3 të Ligjit Nr. 05/L-028, mban në burim 10% të pagës së tatueshme — pa i zbatuar fare shkallët progresive, pra as 0% për pjesën deri 250 € dhe as 8% për pjesën 250–450 €. Baza mbetet e njëjta: bruto minus kontributi pensional 5%.
Kjo e ndryshon shumën dukshëm. E njëjta pagë bruto 500 € jep 456,50 € neto te punëdhënësi kryesor dhe 427,50 € neto te ai sekondar — 29 € ndryshim në muaj. Shënoni kutinë te kalkulatori për ta parë krahasimin.
Bruto bruto — paga e subvencionuar te OJQ-të
Te projektet me donator paga mbulohet e tëra nga një linjë buxheti, dhe ajo linjë quhet «bruto bruto». Shuma e saj deklarohet si pagë bruto, por prej saj dalin të gjitha: kontributi i punëtorit, tatimi, dhe edhe kontributi i punëdhënësit — sepse granti nuk jep asgjë përmbi.
Me bruto bruto 500 €: 25 € kontributi i punëtorit, 18,50 € tatimi dhe 25 € kontributi i punëdhënësit — të angazhuarit i mbërrijnë 431,50 € në bankë. Krahasojeni me pagën e zakonshme bruto 500 €, ku punëtori merr 456,50 € dhe punëdhënësi shton 25 € nga xhepi i vet: shuma në bankë ndryshon pikërisht për ato 25 €.
Modi Bruto bruto punon nga të dyja anët: nëse e dini linjën e buxhetit, ju tregon sa i mbërrin të angazhuarit; nëse e dini shumën që duhet t'i mbërrijë në bankë, ju tregon sa bruto bruto duhet planifikuar në buxhet. Konventën e plotë — me gabimet e buxhetimit dhe dallimin nga kontrata mbi vepër — e kemi te udhëzuesi bruto bruto.
Paga minimale 2026
Sipas vendimit të Qeverisë së Kosovës nr. 10/273, nga 1 korriku 2026 paga minimale është 500 € bruto në muaj (3 € në orë) për punë të rregullt me orar të plotë; nga 1 janari deri më 30 qershor 2026 ishte 425 € bruto. Me pagë bruto 500 €, neto del 456,50 €.
Keni pyetje për pagat, kontributet apo deklarimin mujor? Shikoni afatet tatimore ose na kontaktoni — shërbimi ynë i kontabilitetit i përfshin pagat dhe deklarimet.